कोलोराडोखबर संवाददाता
–आर.आर. चौलागाईं–
हाम्रो सरकार
बन्चरोले कागज काट्छ
र कैँची बोकेर रुख काट्न जान्छ ।
हाम्रो सरकार
खेतमा प्लटिङको अनुमति दिन्छ
र बाहिरबाट चामल आयात गर्छ ।
हाम्रो सरकार
युवाहरूलाई विदेश पठाउँछ
र रेमिटेन्स खाएर आफ्नो खर्च धान्छ ।
हाम्रो सरकार
सित्तैँमा आएको पानी बेच्छ
र घाटा लाग्यो भनेर कोकोहोलो मच्चाउँछ ।
हाम्रो सरकार
खोलो नभएको ठाउँमा पुल हाल्छ
र विकासको नारा घन्काउँछ ।
हाम्रो सरकार
डाँडामा भ्यु टावर ठड्याउँछ
र दूरबीन लगाएर देशको दुर्दशा हेर्छ ।
हाम्रो सरकार
मानव तस्करी गर्छ
र कानूनबाट मन्त्रीलाई बचाउँछ ।
हाम्रो सरकार
देशका हीराहरूलाई रछ्यानमा फाल्छ
र बाहिरका कीराहरूलाई दोसल्ला ओढाउँछ ।
हामी जनता पनि
धारे हात लगाएर सरकारलाई गाली गर्छौँ
र उसैलाई भोट हाल्छौँ ।
–हेटौंडा, मकवानपुर ।
प्रतिक्रिया दिनुहोस्