गजल

–मिथिला अधिकारी–

सबै कुरा समयले खटाउँछ म के भनौं,
आँखामा शत्रु पनि अटाउँछ म के भनौं ।

संगत गर्नु सोचेर मात्रै जमाना खराव छ,
अमिलो परेपछी दूध फटाउँछ म के भनौं ।

गर्न त हर प्रयास गर मलाई सिध्याउने,
ईर्ष्याले तिम्रै आयु घटाउँछ म के भनौं ।

सकेसम्म आफ्नै मनसँग रमाउनु सँगी,
अरूले त अनेक पाठ रटाउँछ म के भनौं ।

तिमीले, मैले सोचे जस्तो छैन यो दुनियाँ,
मदिरा राख्न मन्दिर हटाउँछ म के भनौं ।

–हेटौंडा, मकवानपुर ।