केपी ओली, माधव नेपाल, देवेन्द्र पौडेल र ज्ञानेन्द्र शाहीको अभिनय रहेको ‘नमेटिने घाउ’को ट्रेलर सार्वजनिक

नेपाल । सामाजिक कथावस्तुमा बनेको जनचेतनामूलक फिल्म ‘नमेटिने घाउ’को ट्रेलर सार्वजनिक गरिएको छ ।

बिहीबार काठमाडौंमा एक कार्यक्रमका बीच सार्वजनिक २ मिनेट २४ सेकेण्ड लम्बाईको ट्रेलरमा एसिड आक्रमणका पीडितको पीडा र संघर्षलाई मर्मस्पर्शी रुपमा देखाइएको छ । एसिड बिक्रीवितरणमा पूर्ण प्रतिबन्ध लगाउनुपर्ने आवाज पनि फिल्मले सशक्त रुपमा उठाएको देखिन्छ ।

ट्रेलरमा प्रधानमन्त्री केपी शर्मा ओलीले एसिड पीडितहरूलाई न्याय दिने प्रतिबद्धता जनाएको दृश्य समावेश छ । त्यस्तै, पूर्व प्रधानमन्त्री माधव नेपाल, पूर्वशिक्षा मन्त्री देवेन्द्र पौडेल र राप्रपाका सांसद ज्ञानेन्द्र शाहीले एसिड पीडितको आन्दोलनमा एेक्यबद्धता जनाउँदै ‘एसिड आक्रमण गर्नेलाई कानुनी दायरामा ल्याउँछौं’ भन्दै संवाद बोलेका छन् ।

अभिनेता रमित ढुंगानाको निर्माण र निर्देशनमा बनेको फिल्मले एसिड आक्रमणमा परेका ३३ जना पीडितहरूको कथामा उठाएको छ । यसमा मुस्कान खातुन, रचना गौतम, प्राप्ति पौडेल, इभा गिरी, कमल देवकोटा, सन्दीपबाबु लोहनी, प्रभात पल ठकुरी, आरती आचार्य, सुरवीर पण्डित, सुनिल कटुवाल, अपेक्षा न्यौपाने, क्रान्ति शाह, आरजु लेखक, एलिसा गुरुङ आदिको अभिनय रहेको छ ।

यो फिल्म कृष्ण जन्माष्टमीको अवसर पारेर आगामी भदौ ७ गतेबाट सार्वजनिक प्रदर्शनमा आउँदैछ ।