यूरो कपमा स्पेन र इङ्ल्यान्ड क्वाटर फाइनलमा

नेपाल । जर्मनीमा जारी यूरो कप अन्तरगत जर्जियाविरुद्ध जित दर्ता गर्दै स्पेनले क्वाटरफाइनलमा प्रवेश गरेको छ ।

जर्मनीको कोल्नमा भएको खेलमा स्पेनले ४–१ को जित निकाल्दै अर्को चरणमा स्थान पक्का गरेको हो । स्पेनको जितमा रोड्री, फाबियन रुइज, निको विलियम्स र ड्यानी ओल्मोले १–१ गोल गरे ।

पछिल्लो खेलमा पोर्चुगललाई हराएको जर्जियाले सुरुवाती अग्रता लिएपछि स्पेन दबाबमा परेको थियो । १८ औं मिनेटमा जर्जियाको काउन्टर अट्याकमा आएको क्रस क्लियर गर्न खोज्दा ले नोर्मान्डले आफ्नै पोस्टमा गोल गरेका थिए ।

यसैगरी स्लोभाकियालाई हराउँदै इङ्ल्यान्ड युरो कपको क्वाटरफाइनलमा प्रवेश गरेको छ ।

जर्मनीको गेल्सेनकर्चेनमा भएको प्रि–क्वाटरफाइनल खेलमा इङ्ल्यान्डले अतिरिक्त समयमा पुनरागमन गोल गरेर स्लोभाकियालाई २–१ ले पराजित गर्दै अन्तिम आठमा स्थान बनाएको हो ।

इभान स्क्रान्जले २५औं मिनेटमा स्लोभाकियाका लागि सुरुवाती गोल गरेका थिए । पहिलो खेलमा एक गोल गरेपछि प्रतियोगिताका अवधिभर गोल गर्न संघर्षरत इङ्ल्यान्डले नियमित समयको अन्तिम समयमा बराबरी गोल गर्न सफल रह्यो ।

इन्ज्युरी समयको पाँचौं मिनेट जुड बेलिङ्घमले गोल गर्दै खेल अतिरिक्त समयमा धकेलेका थिए ।

अतिरिक्त समयको पहिलो मिनेटमा नै ह्यारी केनले इङ्ल्यान्डलाई अग्रता दिलाए । सोही गोल जितका लागि पर्याप्त बन्यो ।

इङ्ल्यान्डले अब क्वाटरफाइनलमा स्विट्जरल्यान्ड विरुद्ध खेल्नेछ । स्विट्जरल्यान्डले इटाली माथि जित हात पार्दै अन्तिम आठमा स्थान बनाएको हो ।