बालेनको गम्भीर आरोप: १० हजार करोडको काण्ड लुकाउन ओलीको चलखेल !

नेपाल । न्यूरोडमा काठमाडौं महानगरले बिस्तार गर्न लागेको फुटपाथमा अवरोध सिर्जना गरि संघीय सरकारले पुनः सडक पीच गरेपछि मेयर बालेन शाह आक्रोशित बनेका छन् ।

हाल भौतिक पूर्वाधारमन्त्री नेकपा एमालेका रघुविर महासेठ छन् । यो प्रकरणबाट आक्रोशित बालेनले एमाले अध्यक्ष केपी ओली लक्षित गम्भीर आरोपसहितको स्टाटस लेखेका छन् ।

बालेनको स्टाटसः

१० हजार करोड को कान्ड लुकाउन अर्को कान्ड गरेर जनता नझुक्काउनु होला माननीय केपि ओलीज्यू ।
झापा गिरिबन्धुमा बैना लिनेहरूलाई ‘दुई वर्षभित्र गिरीबन्धुकै जग्गा दिलाउँछौं ‘ भनेर थम्थमाउनु भएछ । गिरीबन्धु चिया बगानको जग्गामा गर्न खोजेको नीतिगत घोटलामा तपाईंको सहभागिताको इतिहास हेर्दा त्यहाँ तपाईंलाई नभनी पात पनि हल्लन्छ भन्ने लाग्दैन ।
यहि १० हजार करोडको काण्ड लुकाउन र जनतालाई भुलाउन राज्यको सम्पुर्ण शक्ति लगाएर न्युरोडमा हामीले बनाउन लागेको फूटपाथ फेरि सडक बनाउनु थाल्नु भएछ ।
अब बल्ल देश बन्ने भएछ । आफ्ना कर्तुत लुकाउन र विषयान्तर गरे पनि काम हुनु राम्रो हो । तपाईंको शक्तिले अब रिङरोड बनाउनु, बुटवल चितवन बाटो बनाउनु, यस्ता धेरै आयोजनामा लगाउनुहोला । हामी साथमा छौँ ।
अनि समयमै गिरिबन्धुमा पीडितको बैना फिर्ता गर्नु होला । नत्र कोही साँच्चैको नयाँ आउला र फाइल पल्टाउला । हुन त, पहिले पनि जेल बस्नु भएको हो । धन्यवाद ।