सरकारका कामकारबाही सकारात्मक दिशामा रहेको सत्ता साझेदार काँग्रेस-एमालेको निष्कर्ष

नेपाल । सत्ता साझेदार नेपाली कांग्रेस र नेपाल कम्युनिस्ट पार्टी (एमाले) का शीर्ष नेता सम्मिलित उच्चस्तरीय राजनीतिक संयन्त्र र कार्यदलको बैठकले सरकारका कामकारबाही सकारात्मक दिशामा रहेको निष्कर्ष निकालेको छ ।

प्रधानमन्त्रीनिवास बालुवाटारमा बुधबार प्रधानमन्त्री एवं एमाले अध्यक्ष केपी शर्मा ओली, पूर्वप्रधानमन्त्री एवं नेपाली कांग्रेस सभापति शेरबहादुर देउवासहित शीर्ष नेता सम्मिलित बैठकले आर्थिक सुधार र राजनीतिक स्थिरताका सन्दर्भमा सरकार सही ‘ट्र्याक’ (बाटो) मा रहेको निष्कर्ष निकालेको हो ।

बैठकपछि गृहमन्त्री एवं कांग्रेस नेता रमेश लेखकले सरकारको कामकारबाहीलाई अझै तीव्रता दिनुपर्ने समझदारी भएको बताउनुभयो ।

बैठकमा एमाले वरिष्ठ उपाध्यक्ष ईश्वर पोखरेल, उपप्रधानमन्त्री तथा अर्थमन्त्री विष्णुप्रसाद पौडेल, परराष्ट्रमन्त्री डा. आरजु राणा देउवा, एमाले महासचिव शङ्कर पोखरेल, प्रधानमन्त्रीका मुख्य राजनीतिक सल्लाहकार विष्णु रिमालसहितका नेता सहभागी हुनुहुन्थ्यो ।