अनेसास कोलोराडोको आयोजनामा सल्लाहकारहरुको स्वागत र रचना वाचन कार्यक्रम सम्पन्न

कोलोराडो । अनेसास कोलोराडो शाखाको आयोजनामा शनिवार (मार्च २२, २०२५) का दिन वेस्टमिनिस्टरस्थित नेपालीघरमा आयोजित साहित्यिक कार्यक्रम सल्लाहकारहरुलाई स्वागत तथा सहभागी साहित्यकारहरुबाट रचना वाचन कार्यक्रम सम्पन्न भएको छ ।

उक्त कार्यक्रमको अध्यक्षता अध्यक्ष किरण अधिकारीले गर्नुभएको थियो भने सञ्चालन महासचिव पुष्पराज पौडेलले गर्नुभएको थियो ।

कार्यक्रममा उपस्थित ४ जना सल्लाहकारहरु अनेसास बीओटी अध्यक्ष पदम विश्वकर्मा, पूर्व अध्यक्ष भूपेन्द्र महत, पूर्वकार्यवाहक अध्यक्ष विजयदेव अधिकारी र सिस्टर्स ग्रुपका अध्यक्ष धन पौडेललाई रुद्राक्षका माला र खादा लगाएर स्वागत गरिएको थियो ।

केन्द्रीय महासचिव राजु सिटौला र केन्द्रीय कोषाध्यक्ष तारा अधिकारीले रुद्राक्षका माला लगाएर सल्लाहकारहरुलाई सम्मान गर्नुभएको थियो ।

शाखाका उपाध्यक्ष निर्मला अर्यालले स्वागत मन्तव्य दिनु भएको कार्यक्रममा यो । अध्यक्ष किरण अधिकारीले शाखाका महासचिव पुष्पराज पौडेल तथा सचिव परिवेश शर्मालाई खादा लगाई स्वागतसँगै संक्षिप्त परिचय गराइएको थियो ।

साथै महासचिव पौडेलले सल्लाहकारप्रति लक्षित छन्द कविता वाचन गरी स्वागत गर्नुभएको थियो । कार्यक्रममा सल्लाहकार रमेश गुरुङ कोलोराडोबाहिर जानुभएकाले उपस्थित हुन नसक्नुभएको जानकारी गराइयो ।

कार्यक्रममा नाट्यकर्मी कृष्णमुरारी ढुङ्गेल, बीओटी अध्यक्ष तथा सल्लाहकार पदम विश्वकर्माले कोलोराडो शाखाको इतिहास, वर्तमान स्थिति र भावी दिशावोध स्मरण गराउँदै कविता वाचन गर्नुभएको थियो । केन्द्रीय महासचिव राजु सिटौला र केन्द्रीय कोषाध्यक्ष तारा अधिकारीले केन्द्रको सहभागिता र मार्गदर्शन गराउँदै गहन रचना वाचन गर्नुभएको थियो । सल्लाहकारत्रय भूपेन्द्र महत, विजयदेव अधिकारी र धन पौडेलले रचना वाचनसहित सम्बोधन गर्नुभएको
थियो ।

कार्यक्रममा पार्वती शर्मा, डा. खगेन्द्रप्रसाद दाहाल, विकास त्रिपाठी, डा. विजयराज शर्मा, भगवती दाहाल, विनयचन्द्र दाहाल, टीका पौडेल, समिर आचार्य, दामोदर लुइटेल, मिलन कोइराला र कमला विश्वकर्माले विभिन्न भाका र शैलीमा आआफ्ना गहकिला, रमाइला र मननीय कविता, गीत, गजल, शुभकामना आदि वाचनसहित सुझाव प्रस्तुत गर्नुभयो ।

शाखा कार्यकारिणी समितिका उपाध्यक्ष निर्मला अर्याल, कोषाध्यक्ष शर्मिला शर्मा, सदस्य देव भट्टराईका व्यावहारिक, सामाजिक भावका रोचक काव्यगानसहित कार्यक्रममा उपस्थित २१ जना साहित्यकारहरुले गद्य वा पद्य कविता, गीत, गजल, शायरी आदि विभिन्न विधाका रचना वाचन गर्नुभएको थियो ।

अन्तमा, आफ्नो गीत गायनसँगै शाखा अध्यक्ष किरण अधिकारीले सल्लाहकारहरु, केन्द्रीय कार्यसमितिका पदाधिकारीहरु, बीओटी सदस्यहरु, शाखाका पूर्वअध्यक्ष, रचनावाचक एवं उपस्थित सबैलाई हार्दिक धन्यवादसहित प्राप्त सुझावहरु मनन गर्ने प्रतिबद्धतासाथ कार्यक्रम समापन गर्नुभयो ।