कविताः म आगोसँग खेल्न तयार छु

-सर्वज्ञ वाग्ले-
आगोको भर्भराउँदो कोइलामा
थर्थरी काम्दैगरेको झाँक्री
खलीमा खेलाउँदै बिरामी
वर्षौँ सँगालेको मन च्यातिएर
सिलाएको टालाटुली रहेछ
जिन्दगी !

जीवन सङ्घर्षको
एउटा लामो कथा हूँ म
झट्ट हेर्दा पट्यारलाग्दो
अभाव
भोक
रोग
र, पीडा-वेदनाका बग्रेल्ती
भारी बोकेको मान्छे !
म देख्छु जताततै
दयाका भाकाहरू गुन्जन्छन्
दम्भका जुँगाहरु ताउ लगाएर
सेवाका भाकाले
दोहोरी गाउन आतुर छन्
महान महाशयहरूको
घुइँचो लाग्छ
मडारिन्छन् ती खुला आकाशको
कुइरोजस्तै यत्रतत्र ।

हातमा बन्चरो
दापमा खुकुरी
अनि काँधमा
हलो बोलेर
बन्जर जमिन
जोत्न निस्केको मान्छे
आगो-पानी र बन्जर
अनि सुख्खा जमिनसँग
एक्लै पौंठेजोरी खेली हुर्केका
यी मेरा कलिला हात
आगोको लप्कासँगै लत्पतिन्छन् ।

बादल र असिना
चट्याङ् अनि बारुदको जीन्दगी
धपक्कै बलेको आगोजस्तै रापिलो छ
बाल्यकाल त्यसै बित्यो
बोर्डर अनि जङ्गलमा
अभाव
अशिक्षा
भोक
अनि गरिबीसँग लडेर
जवानी त
हिन्दुस्तानका गल्ली-गल्लीमा
चौकिदारी गरेर
रातका प्रहरहरु छिचोल्दै सकियो ।

जिन्दगी कि सेकिन्छ
मरूभूमिको बालुवामा
कि फर्किन्छ बाकसमा
सपनाहरु मलामी बनेर
देशका शासकले
दशैँमा पर्सेको बलीको बोकोजस्तै
निरन्तर बेचिने, काटिने
अनि बली चढनुपर्ने
मेरो बाध्यता
आगोसँग खेल्नु हो !

मेरो जिन्दगीको नियति नै यस्तै भएपछी
म आगोसँग खेल्न तयार छु
तयार छु झेल्न
जस्तोसुकै हण्डर पनि
जवानी बोकेर हाँस्दै जाने
फर्किंदा बाकसमा चुपचाप आउने
हो, रेमिट्यान्सभन्दा पहिला
म आफैँ आउने
कोइलाभन्दा चाँडै निभ्ने
आगो हूँ म !

म हाँस्दै-हाँस्दै
घरपरिवार छोडेर
विदेश पसेको मान्छे
कमिलाको ताँतीजस्तै
बत्तीको आगोमा खेल्ने
पुतलीजस्तै
किनकि
यो मेरो नियति हो
आफैँले दिएको भोटको पिरती हो
आगो निलेर कोइला ओकल्नु
बलेको आगोमा खली खेल्नु
नाङ्गा गोडा र नाङ्गा अङ्ग
जाडोमा कठ्याङ्ग्रिएर
लगलग काँप्नु
मेरालागि विरासत हो ।

आगोको भट्टीमा पोलिंदै र पग्लिंदै
नम्बरी सुन बन्नु
मेरो स्वाभिमान हो
जीवन संघर्षमा
निरन्तर दौडनु
मेरो मुकामको तय हुनु हो
म नथाकी नदीजस्तै
सङ्घर्षको मैदानमा बगिरहन चाहन्छु
हो, म आगोको ज्वाला हूँ
पानीको मुस्लो हूँ
ज्वालामुखीको लाभा हूँ म ।

निसंकोच म,
जीवन सङ्घर्षमा डामिन
र होमिन तयार छु
खारिन र पग्लिन
कोइलाको भट्टीमा घुस्न तयार छु
तर म,-
लोभ-मोह र इर्ष्याको
ज्वाला बोक्न सक्दिन
किनकि
म सबैको जयको
सपना बुन्ने प्राणी हूँ  ।

म स्वयम् यो सकल भू-खण्डको
भयावह अग्नि ज्वाला हूँ
र त्यहि ज्वालाबाट निस्केको
तात्तातो लाभा हूँ
म जीवन संघर्षमा आइपर्ने
जस्तोसुकै कठिनाइ झेल्न तयार छु
निडर, निर्भय म
सहर्ष आगोसँग खेल्न तयार छु ।

–अमेरिका ।