कोलोराडोखबर संवाददाता
-आर. आर. चौलागाईं-
हिजो प्रतिपक्षमा हुँदा
जुन मान्छेलाई सज्जन भन्नुहुन्थ्यो
आज सत्तामा गएपछि
त्यही मान्छेलाई ठग भन्नुहुन्छ
म अदनालाई यो कुरा बुझ्न साह्रै गाह्रो परो
बा ! तपाईँ किन कुरा फेर्नुहुन्छ ?
हिजो प्रतिपक्षमा हुँदा
मनमा लागेको कुरा बोल्न पाउनुपर्छ
दमन गर्न पाइँदैन भन्नुहुन्थ्यो
आज सत्तामा हुनुहुन्छ
कसैले मनमा लागेको कुरा बोल्यो भने
लाठी बर्साउनुहुन्छ
पानीको फोहराले हान्नुहुन्छ
र खोरमा जाक्नुहुन्छ
आँखा चिम्लेर दमन गर्नुहुन्छ
म मुर्खलाई यो कुरा बुझ्न साह्रै गाह्रो परो
बा ! तपाईँ किन कुरा फेर्नुहुन्छ ?
बा ! मलाई एउटा कुरा भनिदिनोस् न !
प्रतिपक्षमा हुँदा आँखा देख्ने मान्छे
सत्तामा गएपछि आँखा टालिन्छ हो ?
प्रतिपक्षमा हुँदा कान सुन्ने मान्छे
सत्तामा गएपछि कान थुनिन्छ हो ?
प्रतिपक्षमा हुँदा नायक हुने मान्छे
सत्तामा गएपछि खलनायक हुन्छ हो ?
म लाटालाई यो कुरा बुझ्न साह्रै गाह्रो परो
बा ! तपाईँ किन कुरा फेर्नुहुन्छ ?
–हेटौंडा, मकवानपुर ।
प्रतिक्रिया दिनुहोस्