लघुकथाः महङ्गो सम्मान

–रमेशचन्द्र घिमिरे–

राम्रो नतिजा ल्याएबापत ऊ जिल्लामा पुरस्कृत हुने भयो ।

आमासँग उसले बाटाखर्च माग्यो । आमाले जाने आउने भाडा दिइन् ।

भव्य सम्मान गरियो । उचालिनसक्नुको ठुलो फ्रेम थियो । चिल्लो र दरो कागजमा लेखिएको प्रमाणपत्र थियो । सयपत्रीको मालाको साथमा खादाको ओइरो लाग्यो । निधार रातै भयो ।

कार्यक्रम लामै भयो । कार्यक्रम सकेर सबै लाखापाखा लागे ।

फर्कँदा गाडी छुट्यो । धन्न चिनेको साथी भेटियो र पाँच सय रुपियाँ सापट माग्न भ्यायो ।

त्यही पैसा लिएर ऊ होटेलमा बास बस्न पुग्यो । सादा खाना खायो अनि कमन बेडमा सुत्यो ।

ऊ सुत्ने बेलामा मनमा कुरा खेलाउँदै थियो, “यो खादा र फ्रेम बिक्री हुने भए साथीसँग लिएको सापटी पैसा तिर्न पुग्थ्यो कि !”

–भोर्लेटार, लमजुङ ।