लघुकथाः दण्ड

–रमेशचन्द्र घिमिरे–
***
‘सर, लिनुस् हजुरको भाग’ क्लास मनिटरले कक्षाभित्र छिर्नासाथ गुरुलाई एउटा चोकोपाई टक्र्यायो । गुरुले धन्यवाद दिँदै क्वाप्प खाए अनि मुख पुछ्दै र हात टक्टक्याउँदै सोधे, ‘के तिम्रो आज जन्मदिन हो ?’

‘होइन सर, फाइनको पैसाले कुचो र डस्टबिन किन्दा पैसा उब्रिएको थियो । त्यही पैसाको हो सर !’

‘ए, ल राम्रो गरेछौ । बरु फाइन चाहिँ केको उठाएका थियौ ?’ गुरुले जान्न चाहे ।

‘साथीहरूले इङ्लिस बोल्नुको सट्टा झुक्किएर कहिलेकाहीँ नेपाली बोलिहाल्छन् । एकचोटि नेपाली बोलेको पाँच रुपियाँ फाइन लिने नियम छ, सर !…’ विद्यार्थी थप बोल्न खोज्दै थियो अङ्ग्रेजी माध्यमको विद्यालयमा नेपाली पढाउने ती सर अँध्यारा भए र मनमनै सोचे, ‘कस्तो देश है हाम्रो ? आफ्नै देशमा आफ्नै भाषा बोल्न पनि दण्ड तिर्नुपर्ने …’
***
भोर्लेटार, लमजुङ ।
२०८०-०८-०७