कोलोराडोखबर संवाददाता
–रमेशचन्द्र घिमिरे–
एकछिन गेम खेल्ने हो जे–जे हुन्छ होस्
आज बाको मोबाइल हुन्छ खोसाखोस् ।
हिसाब गर्छु भनेर दाइले तान्नुभो
फेसबुक खोल्न काकीले कैले जान्नुभो ?
नयाँ नौलो यु ट्युबमा केके आएछ ?
मोबाइल हेर्न काकालाई मन लागेछ ।
रेडियोले के भन्छ ? यसमै सुन्छु म
नयाँ खबर सुनेर ढुक्क हुन्छु म
हजुरबाले मागेसी कस्को के लायो ?
तर मोबाइल खोसेर भाइले खेलायो ।
फिलिम् यस्मै हेरिन्छ कतै जान्नँ म
मोबाइल छुन नदिए भातै खान्नँ म
यसो भन्दै दिदीले घुर्की लाउनु भो
फोटा हेरम् भनेर बज्यै आउनु भो
पात्रो हेरम् भनेर ठुल्दाइ आउनु भो ।
गीत सुन्न मन् छ रे कानमा लाएर
मोबाइल माग्दै पिरोल्छे बैनी आएर
कति बज्यो ? भनेर टाइम सोध्नुभो
झोक चलेछ आमालाई मोबाइल खोस्नु भो ।
बेट्री त्यसै नसिध्याऊ सेल्फी खिचेर
फोन गर्ने हो यसको काम अङ्क थिचेर
बाले यसो भन्नुभो चुप्प लाइयो
आखिर बाको मोबाइल बालाई बुझाइयो ।
बिग्रे पनि अब त हुन्न हाम्रो दोष्
आज बाको मोबाइल भयो खोसाखोस् ।
–भोर्लेटार, लमजुङ ।
(२०७५–०३–१०)
प्रतिक्रिया दिनुहोस्