कोलोराडोखबर संवाददाता
नेपाल (हेटौंडा) । मकवानपुरमा बस दुर्घटना हुँदा दुई जनाको मृत्यु भएको छ भने १४ जना घाइते भएका छन् ।
जिल्ला प्रहरी कार्यालय मकवानपुरका अनुसार काठमाडौंबाट हेटौडातर्फ जाँदै गरेको बा प्र ०१–००६ ख ७०७२ नम्बरको बस मकवानपुरगढी गाउँपालिका–२ धरमपानीस्थित कान्तिलोकपथ सडकखण्डमा गएराति १ बजेतिर दुर्घटना भएको हो ।
दुर्घटनामा गम्भीर घाइते भएकी रौतहटकी ५० वर्षीया नीलमदेवी राउतको उपचारको क्रममा बिहान हेटौंडा अस्पतालमा मृत्यु भएको हो । सर्लाहीकी १३ वर्षीया मानुसी मगरको शव बिहान घटनास्थल नजिकैको खोल्सामा फेला परेको हो ।
इलाका प्रहरी कार्यालय मकवानपुरगढीबाट खटिएको प्रहरी निरीक्षक वीरेन्द्र रायमाझीको टोलीले घाइतेको उद्धार गरेको थियो । गाडीमा चालकसहित १६ जना सवार थिए ।
प्रहरीका अनुसार बस सडकबाट करिब २०० मिटर तल खसेको थियो । हेटौंडा अस्पतालमा १० जना र मकवानपुर सहकारी अस्पतालमा अन्य घाइतेको उपचार भइरहेको छ ।
प्रतिक्रिया दिनुहोस्